Zolyty na trzi fronty - 01.10.2023 Bełk.
może kole ło dziewiontyj
ino w doma wyrychtuja
fisz-galerty bo je piontyk
a i kawa sie szluknemy
przeca dzisioj mocie wolne.
Jak zolyty to zolyty,
u Aldony ło dziesiontyj.
Musza wartko sie rychtować
by sie Trudka nie wnerwiła.
Ło dziewiontyj byda u niej,
potym chyca ta Sabina
co we gowie mo fantazja
paćki robi na łobrazach.
Ze artystką sie umówia
wypijemy potym brudzia.
Ło dwunostej do apteki
co by kupić takie leki
żeby stowoł mi na rozkaz
kiedy bydzie już w podwionzkach.
Plany mom jak Napolyon!!!
Podbić serca na Nikiszu!
Potym szpondzić byda w Giszu.
Tam je dziołszek chyba z tałzyn?
Kożdo gryfno jak lilija,
biera gyszynk i podbijom.
Poszoł sobie na kufelek,
niby tylko dlo łodwagi
wylozł wieczór we sobota
ledwie żiwy, cołkiem nagi!
Przegroł wszystko w cymbergaja.
Tyn nosz amant fest puklaty.
Teroz robi na fedrunku
no i spłaco srogie raty.
Złego fara nie naprowi!
a dobrego szynk nie psuje!
A nauka z tego taka :
źodyn sztajger na trzy fronty
bez namysłu nie fedruje.